Në një atmosferë të ngarkuar emocionale, prindër dhe përfaqësues të shoqërisë civile janë mbledhur për të kërkuar drejtësi për vrasjen e 14-vjeçarit Martin Cani, duke organizuar protestën e dytë para Ministrisë së Arsimit. Protestuesit kërkojnë dorëheqjen e ministres së Arsimit, Ogerta Manastirliu, për mosfunksionimin e sigurisë në shkolla, duke e cilësuar tragjedinë si pasojë të neglizhencës dhe indiferencës institucionale.

Një nënë e pranishme në protestë, me lot në sy, shprehu dhimbjen e saj dhe revoltat ndaj asaj që ndodhi në shkollën “Fan Noli”, ku djali i saj kishte studiuar për 9 vjet. Ajo theksoi se djali i saj, si dhe shokët e tij, e njihnin Martin Cani si një fëmijë model. Me dhimbje, ajo tha: “Të marrë pjesë shkolla, shteti në një krim të tillë është e tmerrshme dhe keqardhja më e madhe është se mund të ishte parandaluar. Fatkeqësia më e madhe është se po e vrasin për së dyti Martinin me indiferentizmin e njerëzve.”

Ajo shprehu gjithashtu trishtimin për pjesëmarrjen e ulët në protestë, duke theksuar se ishte një detyrim për të gjithë nënat, baballarët dhe fëmijët e shkollave të Tiranës që të dilnin dhe të mbështesnin kërkesën për drejtësi. “Një djalë i tillë nuk e meritonte, mund të ishte djali i të gjithëve ne. Ne nënat që jemi sot këtu jemi të gjitha nënat e Martinit,” shtoi ajo, duke e përjetuar ngjarjen si një tragjedi personale dhe kolektive.