Bat Yam, Izrael – Kryeministri izraelit Benjamin Netanyahu ka reaguar me tone të ashpra pas sulmeve iraniane që goditën apartamente në qytetin bregdetar të Bat Yam, duke shkaktuar viktima në radhët e civilëve. Nga vendngjarja, Netanyahu tha se “Irani do të paguajë një çmim shumë të lartë për vrasjen e grave, fëmijëve dhe civilëve të pafajshëm”.

Në një deklaratë dramatike, kreu i qeverisë izraelite e përshkroi situatën si një “kërcënim ekzistencial” dhe paralajmëroi se vendi po përballet me një “luftë shpëtimi” kundër agresionit iranian.

“Ne do të arrijmë qëllimin tonë dhe do t’i godasim me një goditje të vetme. Kjo nuk është vetëm mbrojtje, por një betejë për të ardhmen tonë. Sulmet iraniane janë të drejtuara me qëllim ndaj popullatës sonë civile. Kjo është një vijë që nuk do të tolerohet”, theksoi Netanyahu.

Sipas Ministrisë së Shëndetësisë së Izraelit, 12 persona humbën jetën vetëm gjatë 24 orëve të fundit, ndërsa numri total i viktimave izraelite ka shkuar në 15, që nga momenti kur Irani nisi ofensivën e tij si hakmarrje ndaj goditjeve të para të Izraelit.

Qyteti i Bat Yam, një zonë e populluar në afërsi të Tel Avivit, u godit rëndë nga raketat iraniane në orët e para të mëngjesit, me dëme të mëdha në infrastrukturë dhe blloqe banimi. Shumë banorë janë ende nën tronditjen e sulmeve dhe autoritetet vazhdojnë operacionet e shpëtimit në zonat më të prekura.

Ndërkohë, tensionet në rajon vazhdojnë të përshkallëzohen, me kërcënime të ndërsjella mes dy fuqive, ndërsa komuniteti ndërkombëtar i bën thirrje të dyja palëve për përmbajtje dhe ndalje të menjëhershme të armiqësive.