Java u mbyll me temperatura ekstreme që shkuan deri në minus 16 gradë. Ndonëse të parashikuara, ditët e acarit mbërthyen keq vendin, duke krijuar vështirësi në fshatra relativisht të thella, si dhe ndërprerjen e përkohshme të ujit dhe energjisë elektrike në disa zona.
Vendi ynë u përfshi nga reshjet e dëborës si në Veri, ashtu dhe në Jug të vendit, por kjo nuk ka penguar ekipin e borëpastruesve të punonin me orë të tëra nën temperatura ekstreme për të hapur akset rrugore.
Në raportimin ditor, Ministria e Infrastrukturës dhe Energjisë ka bërë një pasqyrë të asaj çfarë ka ndodhur dhe situatës aktuale në të gjithë vendin. Pavarësisht se asnjë aks nuk është i bllokuar, Ministria e Infrastrukturës dhe Energjisë apelon shoferët për përdorimin e gomave të dimrit.
Gjatë mbrëmjes në të gdhirë të së dielës janë raportuar 11 defekte në rrjetin e tensionit të mesëm, 10 prej të cilave janë zgjidhur në kohë rekord dhe në mot të keq. Sakaq, probleme ka pasur edhe në rrjetin e furnizimit me ujë.
Bëhet fjalë për Kukësin, ku ngricat kanë çarë linjën kryesore, e cila deri në orët e vona të së djeshmes, nuk është riparuar. Sakaq, një fshat i këtij qyteti ka shënuar dje të ftohtin maksimal, -16 gradë, ndërkohë që zonat e tjera varionin nga -2 deri në -12 gradë në Juglindje.
Nga ana tjetër, dhe Autoriteti Rrugor Shqiptar ka apeluar shoferët të bëjnë kujdes në lëvizje, të pajisur me goma dimërore e zinxhirë në disa akse. Reshje dëbore ka pasur në zonën e Llogorasë, në Damës-Memaliaj, si dhe në zonën Hani i Hotit Tamarë, ndërsa nuk raportohet për probleme me qarkullimin e mjeteve.
Sipas ARRSH-së, kontraktorët kanë punuar gjatë natës me mjete borëpastruese për shpërndarjen e kripës në të gjitha akset nacionale për të evituar ngricat, pasi temperaturat kanë qenë nën 0°C.
ARRSH-ja u bën thirrje drejtuesve të mjeteve që të bëjnë kujdes në lëvizje, si dhe të pajisen me zinxhirë dhe goma dimërore.
Një tjetër problem për shkak të motit ishte bllokimi i makinave në qafën e Llogorasë, që erdhi si pasojë e daljes nga rruga së një kamioni të ngecur në rrugë pasi ishte spostuar.
Kjo ka shkaktuar radhë të gjatë makinash në vendin e quajtur “Çezma” në Llogora deri në momentin që u bë e mundur hapja e rrugës.
Në kontrast me motin e acartë, një lajm i mirë vjen nga zonat malore të qarkut Shkodër, Theth, Razmë e Vermosh që për herë të parë pas shumë vitesh i gjen të pabllokuar.
