Kryetari i grupit parlamentar të Partisë Socialiste, Niko Peleshi, ka bërë një komunikim të rëndësishëm për mediat ku ka folur për mbledhjen e fundit të grupit dhe çështjen e mandatit të Olta Xhaçkës.

Në mbledhjen e grupit, fokus i rëndësishëm ishte diskutimi mbi buxhetin e vitit të ardhshëm. Peleshi ka theksuar se grupi ka trajtuar me seriozitet vendimin e Gjykatës Kushtetuese në lidhje me mandatin e Xhaçkës.

Ai ka deklaruar: “Grupi parlamentar duhet të bëjë pjesën e vet për të adresuar mendimet e duhura.” Kur është pyetur për mandatin e Olta Xhaçkës, ai ka sqaruar: “Vendimin e Gjykatës Kushtetuese e zbatuam sa i përket futjes në seancën plenare. U zbatua për ta trajtuar në seancë. Është e vërtetë që ky mocion nuk përparon dot për shkak të votimit pro, kundër, dhe abstenimit që është shprehje e paqartësisë.”

Peleshi ka theksuar se ndonëse vendimi është zbatuar në mënyrë të duhur në seancën plenare, situata është komplekse dhe e paqartë për shkak të ndarjes së votave.

“Vijmë pas një takimi në Elbasan të premten, qëllimi ishte krijimi i më shumë sinergjie dhe kuptim më të mirë të situatës ku ndodhemi, duhet përfshirje e angazhim. Qeveria bën punën e saj por grupi bën të vetën edhe në komisione. Kjo ishte fryma që u materializua sot në takimin para seancës së të enjtes”, tha ai.