Prishtinë, 27 tetor 2025 — Komisioni Qendror i Zgjedhjeve (KQZ) ka njoftuar se nga 27 tetori deri më 8 nëntor, qytetarët e Kosovës që jetojnë jashtë vendit mund të ushtrojnë të drejtën e tyre të votës përmes postës, në kuadër të raundit të dytë të zgjedhjeve lokale.

Sipas të dhënave zyrtare, 29.712 shtetas të Kosovës janë regjistruar me sukses për të votuar nga jashtë vendit, pas pjesëmarrjes së tyre në raundin e parë të zgjedhjeve, të mbajtura më 12 tetor.

KQZ ka bërë të ditur se balotazhi do të zhvillohet më 9 nëntor në 18 komuna të vendit, ndërsa lista e votuesve për raundin e dytë është tashmë e certifikuar.

Ndërkohë, më 25 tetor KQZ shpalli rezultatet përfundimtare për zgjedhjet në 35 komuna, ndërsa për Prishtinën, Junikun dhe Mamushën procesi i shpalljes është në pritje për shkak të afatit ligjor 48-orësh për paraqitjen e ankesave në Panelin Zgjedhor për Ankesa dhe Parashtresa (PZAP).

Ky proces i votimit përmes postës konsiderohet një mundësi e rëndësishme për diasporën kosovare, e cila tradicionalisht ka luajtur një rol të rëndësishëm në zgjedhjet lokale dhe qendrore të vendit.