Liga e Kampioneve për sezonin e ri 2024-2025 do të nisë këtë të martë dhe të mërkurë, duke rikthyer në fushë shumicën e klubeve elitare të kontinentit për një performancë sa më të mirë në edicionin e ri të UEFA-s. Në këto objektiva përfshihen edhe skuadrat shqiptare jo vetëm nga Shqipëria, por edhe nga Kosova, Maqedonia e Veriut dhe Mali i Zi, ku kampionët e këtyre vendeve janë pikërisht skuadrat shqiptare.

Kështu, aventura e skuadrave shqiptare që garojnë në Europë do të nisë këtë javë. Plot 11 ekipe mbarëshqiptare do të matin forcat në tri kompeticionet e UEFA-s, me qëllimin për të patur një rrugëtim sa më të gjatë. Egnatia, Ballkani, Struga dhe Deçiq e nisin aventurën e tyre në Champions League.

Egnatia: Kampionia e Shqipërisë, Egnatia, do të debutojë në Ligën e Kampioneve të mërkurën (21:00), përballë skuadrës kampione të Bosnjës, Borak Banja Luka. Ndeshja e parë do të luhet në “Gradski Stadion”, ndërsa ajo e kthimit pas një jave në “Elbasan Arena”. Të besuarit e Edlir Tetovës duan të marrin një rezultat sa më pozitiv që më pas të vendosin kualifikimin në Shqipëri. Në këto ndeshje nuk do të ketë tifozë udhëtues (Borac Banja Luka është pjesë e Republika Srbska) për të shmangur incidentet e mundshme. Diferencat mes dy skuadrave nuk janë të mëdha, ndaj rrogozhinasit mund të besojnë.

Ballkani: Kampion i Kosovës, tashmë dhe me eksperiencën e krijuar në dy pjesëmarrjet radhazi në grupet e Conference League, e nis aventurën europiane me statusin e skuadrës favorite. Skuadra e Ilir Dajës luan këtë të martë në Andorra, përballë Santa Koloma. Dardanët duan që të arrijnë sërish në grupet e një kompeticioni të UEFA-s.

Struga: Kampionët shqiptarë të Maqedonisë së Veriut do të luajnë të mërkurën ndeshjen e parë me Slovan Bratislava, në Sllovaki. Struga synon të sigurojë një rezultat të favorshëm që në ndeshjen e parë për të pasur avantazh në kthimin në shtëpi.