Kryeministri Edi Rama ka ndarë video nga punimet në portin turistik të Vlorës, duke theksuar se kjo iniciativë do të transformojë hapësirën ku ndodhej porti industrial në një destinacion turistik të rëndësishëm. Ndërtimi i portit parashikon të kthejë Vlorën në një qendër turistike me jahte për vizitorët.

Rama shprehet se ky port do të integrojë Shqipërinë në rrjetin e lundrimit turistik me standarde të larta, duke ndikuar pozitivisht në ekonominë lokale dhe rritjen e punësimit.

“MIRËMËNGJES dhe me Portin e Ri Turistik, i cili do ta pasurojë së shpejti peizazhin e Vlorës së Rilindur edhe me jahtet e shumë munguara të vizitorëve, duke e integruar më në fund Shqipërinë në rrjetin e lundrimit turistik me 5 yje të Mesdheut dhe duke hapur burim të ri domethënës rritjeje të punësimit, shërbimeve, të ardhurave nga ekonomia e detit, ju uroj të diel të qetë,” shkruan Rama.

Punimet e plota për ndërtimin e marinës në Vlorë parashikohen të përfundojnë në vitin 2025, por ajo pritet të jetë e përdorshme pjesërisht edhe më herët. Kostot e këtij projekti do të mbulohen nga kompania koncesionare, ndërsa 30 vite pas përfundimit të ndërtimit, porti turistik kalon në pronësi të shtetit shqiptar.