Një 27-vjeçar u arrestua pasi u kap me 63 doza kanabisi, gati për shitje, në një operacion të koduar “Tempulli 2”. Shtetasi, me iniciale R.H., ishte i angazhuar në shitjen e drogës pranë një fushe sporti në Laprakë, një zonë e vizituar nga nxënës të shkollave.

Operacioni, i kryer nga Komisariati i Policisë Nr. 3 në bashkëpunim me Seksionin për Hetimin e Narkotikëve, u zhvillua në kuadër të megaoperacionit policor mbarëkombëtar antidrogë “Tempulli 2”. Shtetasi R.H. u kap në flagrancë në rrugën “Mati Logoreci” në Tiranë.

Nga hetimet rezultoi se ai siguronte lëndën narkotike kanabis në sasi, e ndante në doza dhe e shiste në zonën rreth fushe sporti në Laprakë, e cila vizitohej nga nxënës. Gjatë kapjes, 63 doza me kanabis u sekuestruan nga sahati i ujit në një pallat pranë fushe sporti.

Shtetasi u arrestua dhe iu dorëzua Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme. Po vazhdon puna për identifikimin e personave të tjerë të implikuar në këtë veprimtari kriminale.