Një ngjarje e jashtëzakonshme ka ndodhur në Teksas, ku një vajzë 10-vjeçare arriti të shpëtojë vëllain e saj 7-vjeçar që po mbytej nga një karamele.

Ndërsa fëmijët po filmonin lojën e tyre, 7-vjeçari papritmas ndalet duke mbajtur gjoksin dhe duke u përpjekur për të marrë frymë. Motra e tij, Leah, nuk humbi kohë: ajo e goditi fort në shpinë dhe më pas kreu manovrën e Heimlich-ut, duke hequr karamelën dhe duke i rikthyer frymëmarrjen vëllait.

Videoja e momentit, e publikuar nga policia e Lavonit, tregon qetësinë dhe vendosmërinë e Leah, e cila kishte mësuar manovrën përmes kurseve të ndihmës së shpejtë dhe nga nëna e saj, e punësuar në departamentin lokal të policisë.

Nëna e fëmijëve, Heather James, u shpreh emocionuar për ngjarjen: “Ishte e vështirë ta shihja videon, por jam shumë krenare për të”.

Fëmijët tani janë jashtë rrezikut, ndërsa Leah u bë heroina e familjes dhe e komunitetit.