Partia Demokratike ka prezantuar këtë të shtunë programin e saj elektoral për zgjedhjet vendore të 11 Majit, duke vënë në qendër të tij ekonominë, shëndetësinë, arsimin, rininë dhe strehimin. Gjatë një eventi të mbajtur në Tiranë, anëtari i Kryesisë së PD, Belind Këlliçi, shpalosi reformat e propozuara nga opozita me premtimin për t’i kthyer shqiptarëve shpresën dhe dinjitetin e munguar.

Në zemër të programit është “Paketa e Emergjencës”, që përfshin:

• Minimum jetik 200 euro për pensionistët, personat me aftësi të kufizuar dhe familjet që përfitojnë ndihmë ekonomike.
• Paga minimale 500 euro dhe paga mesatare 1200 euro, si standard i ri për punëtorët dhe profesionistët shqiptarë.
• Çmimi i energjisë 7 lekë për Kë/h, për të garantuar një tarifë të drejtë për qytetarët që jetojnë në një vend me burime të pasura hidrike.

Në fushën e shëndetësisë, PD propozon:

• Dyfishimin e buxhetit për shëndetësinë, për të përmirësuar infrastrukturën, pagat dhe shërbimet.
• Model i ri sigurimesh shëndetësore, me më shumë mundësi dhe konkurrencë për qytetarët.
• Zgjerimi i listës së barnave të rimbursuara dhe kontroll i rreptë ndaj cilësisë së ilaçeve.

Programi për arsimin dhe rininë përfshin:

• Dyfishim i buxhetit për arsimin, investime në kërkimin shkencor dhe përmirësimin e infrastrukturës arsimore.
• Zerim i taksave për 3 vite për bizneset e të rinjve, si nxitje për sipërmarrjet e reja.
• Strehim për çiftet e reja, me subvencionim të 20% të kredisë dhe ofrimin e 30 mijë eurove kredi pa interes.

Në fund të prezantimit, drejtuesi i fushatës së PD-së, Chris LaCivita, deklaroi se programi i PD-së është konservator dhe i frymëzuar nga Ronald Reagan dhe Donald Trump, duke theksuar se synon uljen e taksave dhe një orientim të fortë drejt familjes dhe të rinjve shqiptarë.

“Berisha është një mik i familjeve shqiptare. Ai ka një plan për uljen e kostos së jetesës, për të ndalur shpopullimin dhe për të kthyer besimin tek Shqipëria,” – u shpreh LaCivita, duke e konsideruar qeverisjen e Ramës si “një dështim të madh 12-vjeçar”.

PD angazhohet gjithashtu për reforma të thella në administratë, infrastrukturë dhe mirëmenaxhim të buxhetit, si pjesë e një vizioni të ri për qeverisjen e vendit.