Drejtuesja e Departamentit të Arsimit në Partinë Demokratike, Lili Sula, reagoi ashpër lidhur me arrestimin e Drejtoreshës së Agjencisë Kombëtare të Arsimit Parauniversitar, Arta Dollani, duke e cilësuar ngjarjen si “një tjetër skandal për këtë qeveri”.

Sula theksoi se arrestimi i kreut të arsimit parauniversitar përbën “ngjarje të zezë për mësuesit, nxënësit dhe shoqërinë” dhe sipas saj, dëshmon degradimin e sistemit arsimor dhe fenomenin e “partisë-shtet”, që ka dobësuar institucionet në vend gjatë viteve të fundit.

Ajo kujtoi karrierën e mëparshme të Dollanit, duke përmendur periudhën kur drejtoi Institutin e Monumenteve të Kulturës, ku sipas PD-së u ndërmorën vendime të diskutueshme në fushën e trashëgimisë kulturore. “Nga punonjëse e thjeshtë e bashkisë, Dollani u katapultua në pozicionet më të rëndësishme, për të firmosur aktet e fundit të groposjes së sistemit edukativ,” tha Sula.

Reagimi i PD-së gjithashtu theksoi menaxhimin e diskutueshëm të institucionit nga Dollani: paraqitje të shkurtra në punë dhe një regjim të rreptë kontrolli ndaj stafit. “Ky standard i dyfishtë është tregues i arrogancës së pushtetit dhe i shkatërrimit të çdo parimi të barazisë dhe përgjegjshmërisë institucionale,” tha Sula.

Në përfundim, ajo e cilësoi Dollanin si “simbol të degradimit qeverisës” dhe e lidh arrestimin e saj me kontrabandën e mbetjeve të rrezikshme, duke e konsideruar një zhvillim shqetësues për arsimin në vend.

Sula bëri thirrje për pjesëmarrje në protestën kombëtare të paralajmëruar për datën 10 shkurt, duke ftuar qytetarët t’i bashkohen “pa dallim partiak apo ideologjik”, për të kërkuar drejtësi dhe integritet në institucionet arsimore.