Në 7 janar 2024, një vit më parë, qyteti i Vlorës u trondit nga një atentat mafjoz, ku Gëzim Sinomati, djali i Sokol Sinomatit, i njohur ndryshe me nofkën Buzderri, u ekzekutua me një snajper. Ngjarja ndodhi rreth orës 22:00, kur në sallën operative të policisë u raportua për të shtëna me armë. Policia dhe Forca e Posaçme të Ndërhyrjes (FNSH) mbërritën menjëherë në vendin e ngjarjes, ku konstatuan se nuk bëhej fjalë për përdorimin e një kallashnikovi, por për një ekzekutim të realizuar me shumë kujdes.

Nga hetimet u zbulua se atentati u krye nga një automjet i cili ndodhej në një distancë të sigurt, përballë një blloku betoni, nga sedilja e pasme e të cilit u qëllua një herë në katin e tretë të pallatit ku jetonte Gëzim Sinomati. Ai sapo kishte dalë në ballkon për të pirë cigare kur një plumb i mori jetën. Në fillim, autoritetet dyshuan se mund të kishte pasur një ngatërrim shënjestre, duke patur parasysh lidhjet e mundshme me xhaxhanë e Gëzimit, Benard Sinomatin.

Një vit pas ngjarjes, hetimet janë ende në vazhdim, pa identifikuar autorët e atentatit. Ish-drejtori i Policisë së Vlorës, Ermal Muça, në atë kohë kishte premtuar se ngjarja do të zbardhej shpejt, por sot, një vit më vonë, rasti mbetet pa autor.

Ngjarja ndodhi në afërsi të Poliklinikës së Vlorës, ku një automjet tip BMW qëndroi përballë shtëpisë së Gëzim Sinomatit për afro 30 minuta. Në një moment, kur energjia elektrike u shkëput për rreth 10 minuta, një plumb u qëllua ndaj Gëzimit, duke e lënë të vdekur në vend.

Pas atentatit, qyteti ka përjetuar edhe disa episode të tjera që lidhen me bandat lokale. Dy nga këto ngjarje ndodhin në Vlorë dhe një në Tiranë, duke bërë të besuar se ekziston një lidhje mes tyre. Një ngjarje e tillë ishte vendosja e një lënde eksplozive në lokalin “The Boss” në Lungomare në 8 dhjetor 2024, atentati ndaj Kevit Hajrulla në 18 dhjetor në zonën e Çoles, si dhe ngjarja e një atentati me tritol në Tiranë ndaj shtëpisë së marrë me qera nga Elena Arza dhe Benard Sinomati.

Këto incidente kanë ndezur përplasjet e bandave në qytetin e Vlorës, ku fitili i përplasjeve është ndezur që me ekzekutimin e Gëzim Sinomatit një vit më parë.