Udhëheqësi i Azerbajxhanit, Ilham Aliyev, ka akuzuar sërish Moskën se po tenton të mbulojë ngjarjen e rrëzimit të avionit që çoi në humbjen e 38 jetëve muajin e kaluar, në një periudhë kur marrëdhëniet midis dy fqinjëve janë përkeqësuar. Gjatë një takimi me dy stjuardesat e mbijetuara dhe familjet e anëtarëve të ekuipazhit që humbën jetën, Aliyev tha se hetimi paraprak i ngjarjes ka konfirmuar se avioni ishte goditur nga mbrojtja ajrore ruse, sipas agjencisë shtetërore të lajmeve të Azerbajxhanit, AZERTAC.
Aliyev theksoi se hapësira ajrore mbi Grozny, kryeqytetin e republikës jugore ruse të Çeçenisë, ishte mbyllur vetëm pasi avioni ishte goditur nga mbrojtja ajrore ruse, dhe se kjo ka ndodhur për shkak të veprimeve të Federatës Ruse. Ai kërkoi drejtësi, dënimin e fajtorëve, transparencë të plotë dhe trajtim human për viktimat e tragjedisë.
Këto akuza vijnë pas një faljeje të kërkuar nga presidenti rus Vladimir Putin disa ditë pas rrëzimit të avionit, i cili ndodhi në hapësirën ajrore ruse. Putin kërkoi falje për incidentin, por nuk pranoi përgjegjësinë. Ai tha se sistemet e mbrojtjes ajrore ruse ishin aktive në momentin kur avioni u përpoq të ulej në Grozny dhe se zona po sulmohej nga dronët luftarakë ukrainas.
Në reagimin e tij, Aliyev theksoi se versionet që po ofron Rusia për këtë ngjarje janë “absurde” dhe kanë shkaktuar “befasi, keqardhje dhe indinjatë të drejtë” në Azerbajxhan. Ai shtoi se, nëse autoritetet ruse do të kishin marrë masa në kohë për të mbyllur hapësirën ajrore mbi Grozny dhe nëse do të ishin respektuar rregullat e shërbimeve tokësore dhe koordinimi midis forcave të armatosura dhe shërbimeve civile të Federatës Ruse, tragjedia do të ishte shmangur.
