Kreu i Urgjencave Kombëtare, Skënder Brataj deklaroi se prej një jave ka një ulje të lehtë të indikatorëve të infektimeve me COVID-19 në vendin tonë.

Brataj nga konferenca e Komitetit të Ekspertëve Teknik tha se situata është në kontroll.

“Nuk ka rritje, por ulje të lehtë të indikatorëve. Edhe në qendrën e Urgjencës nëse ishim 470 vizita, sot jemi 390-400. Nëse në datën 19 shtator vitin e kaluar, kishim 178 pacientë në spitale, sot 216 të shtruar. Çfarë ka treguar deri tani situata? Mbrojtja nga format e rënda është shumë e mirë dhe është rritur trajtimi në banesë dhe ulja e rasteve të humbjeve. Midis këshillimit, që sot qytetarët kanë më shumë besim, e ndjekin sëmundjen në shtëpi. Për rastet që kanë nevojë shërbehen në banesë. Situata është në kontroll.”, tha Brataj.

Ndërkohë mjekja pediatre, Gjerogjina Kuli, foli për fëmijët e infektuar me virusin dhe si e përballojnë ato betejën me sëmundjen.

Sipas mjekes, ka pasur një rritje të infektimit të fëmijëve, por për fat të mirë, ata nuk paraqesin komplikacione të shumta.

Edhe pse shifrat e shtrimeve tek fëmijët janë rritur, ata arrijnë të rikuperohen brenda pak ditësh prej infeksionit. Sipas saj numri i fëmijëve të hospitalizuar që prej fillimit të pandemisë është 360 dhe numri i fataliteteve nuk ka ndryshuar që prej vitit të shkuar, ku u shënua vetëm një humbje jete.

“Edhe te ne është pasqyruar rritja e rasteve pozitive në këtë valë të re të COVID-it. Kemi një rritje të ritmit të shtrimeve në fëmijë të formave të mesme të moderuara, por fatmirësisht situata klinike është në kontroll.

Fëmijët ranimohen brenda disa ditësh dhe na kanë dhënë mundësi të mos kalojmë kapacitetet spitalore. Fatmirësisht shifrat e fatalitetit mbeten po ato që kemi dhënë, s’kemi asnjë rast deri më tani me komplikacione post-COVID”, tha mjekja.