Një përplasje e fortë verbale u zhvillua sot në Kuvend mes kryeministrit Edi Rama dhe kreut të grupit parlamentar të Partisë Demokratike, Gazment Bardhi. Gjatë diskutimeve, kryeministri Rama parashikoi se PD do të ketë një rezultat edhe më të keq në zgjedhjet e 2025-ës se sa në zgjedhjet e vitit 1997.

Në përgjigje të akuzave të Ramës, Gazment Bardhi reagoi ashpër duke akuzuar qeverinë e Rilindjes për lidhje me krimin e organizuar. “O shoku i Mondit, pse u bëre nervoz? Ne mund të jemi të drejtë dhe të qartë në qëndrimet tona, por nuk jemi kurrë në gjunjë përpara krimit të organizuar dhe nuk i lëpijmë atyre nga mëngjesi në darkë,” tha Bardhi.

Ai gjithashtu akuzoi qeverinë për mungesë premtimesh të mbajtura, duke përmendur legalizimet falas dhe shëndetësinë falas, të cilat sipas tij, nuk janë realizuar. “Ju jeni shërbëtorë të krimit të organizuar, ndërsa ne jemi shërbëtorë të qytetarëve,” përfundoi Bardhi, duke e intensifikuar debatin me Ramën.