Një nënvariant i ri i Koronavirusit, XBB.1.5, i cili po përhapet me shpejtësi në gjithnjë e më shumë vende dhe tenton të bëhet dominues, është më ngjitësi deri më sot. Epidemiologia Dr. Maria Van Kerkhove e OBSH tha se nënvarianti i ri është zbuluar tashmë në 29 vende.

“Është nënvarianti më i transmetueshëm që është zbuluar deri më tani”, tha Van Kerkhove gjatë një konference për shtyp. “Arsyeja për këtë janë mutacionet që ndodhen brenda këtij nënvarianti të Omikronit duke lejuar që ky virus të ngjitet në qelizë dhe të replikohet lehtësisht.”

OBSH nuk ka ende asnjë të dhënë për ashpërsinë e XBB.1.5, por nuk ka asnjë tregues për momentin që i bën njerëzit më të sëmurë se versionet e mëparshme të omicron. Grupi këshillues i OBSH-së që gjurmon variantet e Covid-it po kryen një vlerësim të rrezikut në XBB.1.5 që do ta publikojë në ditët në vijim.

“Sa më shumë qarkullon ky virus, aq më shumë mundësi do të ketë për të ndryshuar,” tha Van Kerkhove. “Ne presim valë të mëtejshme të infeksionit në të gjithë botën, por kjo nuk duhet të përkthehet në valë të mëtejshme vdekjesh sepse kundërmasat tona vazhdojnë të funksionojnë.”

Ndërsa XBB.1.5 përhapet me shpejtësi në SHBA, Kina po lufton me një rritje të rasteve dhe shtrimeve në spital pasi braktisi politikën e saj zero-Covid në përgjigje të trazirave sociale në fund të vitit të kaluar. Zyrtarët globalë të shëndetësisë kanë thënë se Pekini nuk po ndan të dhëna të mjaftueshme.