Ministrja e Shëndetësisë, Ogerta Manastirliu ka siguruar se të gjithë shqiptarët që do të kërkojnë ndihmë mjekësore në spitalet publike nuk do të vuajnë nga mungesa e barnave.

Pas mbledhjes së përjavshme të qeverisë, Manastirliu u pyet për mungesën e ilaçeve në Onkologji por me diplomaci iu shmang përgjegjësisë duke dhënë një përgjigje diplomatike.

Pyetje: Nga burimet bëjnë me dije për mungesë e barnave në Onkologji, familjarët e blejnë një medikament jashtë spitaleve, përse nuk ka furnizim me ilaçe?

“Unë në komunikime të tjera e kam bërë me dije se janë siguruar të gjitha medikamentet që ka nevojë spitali në Nënë Tereza. Nëse ke nevojë për informacion për sasinë e barnave drejtoju kësaj strukture në QSUT lidhur me sasinë dhe afatet e skadencës së barnave. Por ne si ministri do të garantojmë buxhet të nevojshëm që mos ketë problematikë dhe mungesë edhe për barna për repartin e Onkologjisë. Duam që të kemi në vazhdimësi për furnizimin me barnat, ne kemi hapur edhe procedurat e prokurimit publik nuk na mungojnë as fondet as bashkëpunimi për të garantuar furnizimin me barna”, tha fillimisht Manastirliu.

Pyetje: Ilaçet që kanë munguar për fëmijët që vuajnë nga sëmundjet e rënda, e kujt është përgjegjësia. Prindërit i kanë siguruar vetë këto ilaçe, e ndjeni veten për të dhënë dorëheqjen?

“Informacionet që kërkoni bëni kërkesë në spitalin Nën Tereza dhe ata do t’u japin informacione për gjendjen e barnave. Mesa di unë ju keni çuar edhe një kërkesë në organet e prokurorisë dhe të presim përgjigje. Ministria i jep garanci të plotë që buxheti dhe financimi për barnat në gjithë spitalet e Shqipërisë nuk do të mungojë dhe ne do ta ndjekim me ligj”, tha Manastirliu.