Forcat amerikane kanë zhvilluar një operacion të ri detar kundër trafikut të drogës në Oqeanin Paqësor, që ka përfunduar me 14 persona të vrarë dhe 2 të zhdukur, sipas njoftimit të Sekretarit të Mbrojtjes, Pete Hegseth.

Njëri prej të zhdukurve është shpëtuar nga autoritetet meksikane, ndërsa operacioni, i cili u krye të hënën me urdhër të Presidentit Donald Trump, synonte katër anije të dyshuara për trafik narkotikësh, të identifikuara më parë nga shërbimet e inteligjencës amerikane.

Sipas Hegseth, anijet po transportonin sasi të mëdha droge dhe ishin pjesë e një rrjeti të njohur ndërkombëtar trafiku. “Departamenti ka kaluar mbi dy dekada duke mbrojtur atdhe të tjerë. Tani po mbrojmë tonin,” – shkroi ai në platformën X (ish-Twitter).

Operacioni është pjesë e fushatës amerikane kundër trafikantëve të drogës që shtrihet në Karaibe dhe në Paqësor, dhe deri tani kanë humbur jetën të paktën 51 persona, duke shtuar tensionet mes SHBA-së dhe disa qeverive të Amerikës Latine, përfshirë Kolumbinë dhe Venezuelën.