Një tjetër person në kërkim ndërkombëtar është vënë në pranga në Tiranë, si rezultat i operacionit policor të koduar “Operacionalja 37”, i zhvilluar nga Drejtoria e Forcës së Posaçme Operacionale, në bashkëpunim me FAST ALBANIA dhe ENFAST (Rrjeti Evropian i Njësive të Kërkimit të Personave).
I arrestuari është Genti Beqiri, i njohur edhe me emrin Eduard Pano, 45 vjeç, banues në Tiranë.
Ai ishte në kërkim nga drejtësia italiane, konkretisht nga Gjykata e Apelit të Napolit, për akuzat:
• Pjesëmarrje në grup kriminal,
• Trafikim të lëndëve narkotike,
• Falsifikim dokumentash,
të parashikuara nga legjislacioni penal italian.
Arrestimi i tij u bë me qëllim ekstradimin drejt Italisë.
Interpol Tirana është në kontakt të vazhdueshëm me Interpol Romën për të përfunduar procedurat ligjore të ekstradimit.
Policia e Shtetit thekson se operacionet për kapjen e personave në kërkim ndërkombëtar do të vijojnë pandërprerë, si pjesë e përpjekjeve për forcimin e rendit dhe sigurisë në vend.
