Komisariati i Policisë Nr. 2, në vijim të punës për goditjen e paligjshmërive në fushën e vjedhjes së pasurisë, organizoi dhe finalizoi operacionin policor të koduar “Monopati 2”.

Gjatë operacionit u dokumentuan me prova ligjore 12 vjedhje të kryera në zona të ndryshme të Tiranës. U arrestua shtetasi F. D. (B.), 30 vjeç, dhe u proceduan në gjendje të lirë shtetasit A. K., 20 vjeç, dhe J. F., 19 vjeç, të tre banues në Tiranë.

Shtetasi F. D. u kap në flagrancë duke vjedhur një monopatinë në rrugën “Perlat Rexhepi”. Gjatë kontrollit fizik, shërbimet e Policisë i gjetën dhe sekuestruan sasi lënde narkotike kokainë. Nga hetimet e kryera, dyshohet se ky shtetas është autor i 11 vjedhjeve të monopatinave, të kryera gjatë periudhës mars-maj 2024. Ndërkohë, shtetasit A. K. dhe J. F. kanë përvetësuar monopatinat e vjedhura.

Gjatë kontrollit të banesës së shtetasit F. D., shërbimet e Policisë gjetën dhe sekuestruan dy monopatina të dyshuara të vjedhura, të cilat u sekuestruan në cilësinë e provës materiale. Materialet i kaluan Prokurorisë për veprime të mëtejshme.