Dy shtetas kinezë janë arrestuar në aeroportin “Nënë Tereza” në Rinas pasi u kapën duke tentuar të fusnin në Shqipëri një sasi të madhe droge të llojit Cannabis Sativa, me përqindje të lartë THC.
Sipas njoftimit zyrtar të Policisë së Shtetit, lënda narkotike – rreth 61 kilogramë, e ndarë në 120 pako dhe fshehur në dy valixhe – ishte nisur nga Tajlanda, me tranzit në Emiratet e Bashkuara Arabe, dhe kishte si destinacion Shqipërinë.
Operacioni policor, i koduar “Quality”, u zhvillua nga Drejtoria Vendore e Policisë Tiranë, në bashkëpunim me Policinë Kufitare të Rinasit, Njësinë e Informacionit për Pasagjerin dhe Drejtoria e Hetimit Doganor.
“Kapen në Rinas, nga Policia Kufitare, dhe vihen në pranga 2 shtetasit kinezë që trafikuan lëndën narkotike nga Bangkoku, me qëllim shitjen në Shqipëri,” – thuhet në njoftimin e Policisë.
Të arrestuarit janë:
• Y. G., 37 vjeç
• Ch. J., 48 vjeç
Policia bën me dije se kanabisi i sekuestruar ishte me përqindje të lartë THC, çka e rrit ndjeshëm vlerën e tij në treg, ndërsa hetimet vijojnë për të zbuluar bashkëpunëtorë të tjerë në këtë linjë të trafikimit ndërkombëtar.
“Vijojnë hetime të thelluara për të identifikuar dhe nxjerrë përpara përgjegjësisë penale shtetas të tjerë që mund të jenë implikuar në këtë rast,” – saktëson më tej Policia e Shtetit.
Materialet procedurale janë referuar në Prokurorinë e Tiranës për veprime të mëtejshme ligjore.
