Pas tre javësh hetime intensive, Policia e Durrësit ka finalizuar operacionin e koduar “Storm 9”, duke goditur një grup kriminal të përfshirë në trafikimin e grave dhe shfrytëzimin për prostitucion.

Në qendër të hetimit është shtetasi D. G., 28 vjeç, me origjinë nga Kolumbia, i cili është shpallur në kërkim ndërkombëtar si organizatori kryesor i aktivitetit kriminal. Ai akuzohet për veprat penale “Trafikimi i personave të rritur” dhe “Shfrytëzimi i prostitucionit”.

Gjatë operacionit, u arrestuan në flagrancë dy shtetase kolumbiane, M. A. dhe Y. C., të dyja 24 vjeçe, që kishin marrë me qira një apartament në lagjen nr. 18 të Durrësit, ku ushtronin prostitucion dhe shpërndanin lëndë narkotike.

Policia ka nisur procedim penal për pronarin e apartamentit, V. R., 45 vjeç, për “Fshehje të të ardhurave” dhe “Moskallëzim krimi”, si dhe për tre persona të tjerë, M. S., E. B. dhe A. H., të cilët akuzohen për “Prostitucion”.

Gjatë kontrollit, në banesë u sekuestruan lëndë narkotike e dyshuar si cannabis sativa, një shumë parash e përfituar nga veprimtaria e paligjshme, pesë celularë dhe pasaportat e dy vajzave kolumbiane.

Policia e Durrësit ka njoftuar se vijojnë hetimet për kapjen e organizatorit dhe për identifikimin e lidhjeve të mundshme të rrjetit me grupime të tjera ndërkombëtare.