Policia e Elbasanit ka finalizuar operacionin e koduar “Threat”, të zhvilluar nga Seksioni për Hetimin e Krimeve ndaj Pasurisë në bashkëpunim me Komisariatin e Policisë Elbasan dhe nën drejtimin e Prokurorisë së Elbasanit.

Si rezultat i aksionit u arrestuan në flagrancë dy shtetas të rinj, P. G., 21 vjeç, dhe D. S., 23 vjeç, banues në Elbasan, të dy me precedent penal në fushën e narkotikëve, armëmbajtjes pa leje dhe krimeve kundër personit. Ata dyshohet se gjatë dy muajve të fundit kanë ushtruar dhunë dhe kanosur dy persona, babë e bir, për t’i detyruar të kthenin paratë e marra me fajde.

Gjatë operacionit, autoritetet sekuestruan një automjet dhe tre telefona celularë që dyshohet se janë përdorur në veprimtarinë e paligjshme.

Materialet procedurale i janë referuar Prokurorisë së Elbasanit për veprime të mëtejshme, ndërsa dy të arrestuarit akuzohen për veprat penale “Shtrëngimi me anë të kanosjes ose dhunës për dhënien e pasurisë” kryer në bashkëpunim dhe “Ushtrimi pa licencë i veprimtarisë bankare”. Autoritetet vijojnë hetimet për dokumentimin e rasteve të tjera të mundshme të dhënies së parave me fajde nga të dy të rinjtë.