Një ngjarje e rëndë ka tronditur sot kryeqytetin e Kosovës, ku dizajneri i njohur Festim Isufi është gjetur i vdekur në banesën e tij në “Rrugën B” në Prishtinë. Gruaja e tij, Rina, është gjetur e plagosur rëndë nga goditje me thikë, por fatmirësisht ndodhet jashtë rrezikut për jetën, sipas burimeve zyrtare.

Ngjarja tragjike ndodhi vetëm pak orë pasi çifti kishte qenë aktiv në rrjetet sociale. Ata kishin postuar së bashku njoftime për ofertë likuidimi deri në 70% në kompaninë e tyre të modës, duke shënuar fillimin e një faze të re para sezonit të ri.

Më herët gjatë muajit, Festimi kishte shpallur thirrje për kurse profesionale në industrinë e modës, duke ndarë me ndjekësit planet e tij për të kontribuar në rritjen e profesionistëve të rinj në fushën që ai e dominonte prej vitesh.

Policia dhe organet hetimore janë në vendngjarje dhe ende nuk kanë dalë me një version zyrtar për rrethanat dhe shkakun e ngjarjes, ndërsa mediat lokale raportojnë për hetime të shumta në vijim.

Kjo ngjarje ka lënë në zi komunitetin artistik e të modës në Kosovë dhe më gjerë, teksa miq, bashkëpunëtorë dhe ndjekës të Festim Isufit kanë shprehur dhimbjen e tyre në rrjete sociale.