Orlando Rakipi është shfaqur i tensionuar në mbledhjen e sotme të grupit parlamentar socialist, ku pret që kolegët të shprehen dhe vendosin për fatin e tij, pasi babai i tij Aqif Rakipi u shpall non grata nga SHBA duke i vendosur sanksione ekonomike.

Deputeti 30-vjeçar shihet nga regjia e ERTV-së duke rrotulluar stilolapsin në një kohë që Rama po shprehej për kushtet që duhet të plotësojë kandidati për president republike.

Vetë deputeti i ri, në moshë dhe eksperiencë, do të shprehej pak ditë më parë se babai i tij ishte i pastër, dhe këtë do ta vërtetojë edhe në organet e drejtësisë në SHBA, sa kohë që sanksionet ekonomike që u aplikuan nga DASH për Rakipin janë të apelueshme.

Nga ana tjetër Rakipi, është një prej deputetëve më të votuar personalisht në zgjedhjet e 25 Prillit, duke thyer dhe herësin e famshëm të vendosur për listat gjysmë të hapura. Votat personale që ai mori, bënë diferencën në rezultatin e përgjithshëm të zgjedhjeve në kryeqytet.

Qëndrimin e grupit për Rakipin pritet ta komunikojë pas mbledhjes Taulant Balla, ndërkohë që socialistët do të duhet të tregojnë se standardi për non grata, duhet të jetë i ndryshëm nga ai që akuzojnë kundërshtarin e tyre Sali Berisha.