Gjatë një takimi të zhvilluar në Qytetin Studenti, aktivisti Osman Stafa përkujtoi kontributin e qytetarëve dhe studentëve në 8 dhjetorin e vitit 1990, një moment historik që shënoi lindjen e pluralizmit dhe krijimin e Partisë Demokratike.

Ai theksoi rëndësinë e ruajtjes së kujtesës historike dhe krenisë për arritjet 35-vjeçare të demokracisë në Shqipëri, duke kritikuar goditjet që, sipas tij, kanë pësuar familja dhe shoqëria shqiptare në dekadat e fundit. Stafa gjithashtu u ndal tek nevoja për përkushtim kolektiv në përmirësimin dhe pastrimin e “shtëpisë së përbashkët”, duke përfshirë Partinë Demokratike dhe vendin.

Në fjalimin e tij, Stafa u shpreh:
“Ne disa faza i kemi kaluar, por jo çdo fazë e tij ka treguar që e pjek burrin. Ne kemi nevojë për më shumë mirëkuptim me njëri-tjetrin, për tolerancë dhe për të qenë më të vendosur.”

Ai shtoi më tej:
“E fundit që do të sugjeroja, ka një parim: nëse një pjesëtar familjeje në darkë lëviz dhe kthehet në mëngjes, ai nuk është më pjesë e familjes. Unë atë pjesëtar të familjes e pastroj. Ne kemi nevojë të pastrohemi doktor Berisha, ne duhet të jemi vetvetja. Shqiptarët shpresojnë dhe besojnë tek ne.”

Deklaratat e Stafës u pritën me vëmendje nga të pranishmit dhe u fokusuan tek nevoja për unitet, transparencë dhe përkushtim ndaj idealit demokratik, duke nënvizuar rolin e Partisë Demokratike në historinë dhe të ardhmen e vendit.