Një konflikt i dhunshëm i ndodhur mbrëmjen e djeshme në qytetin e Vlorës ka përfunduar me dy persona të plagosur me thikë. Ngjarja, e dokumentuar nga kamerat e sigurisë në zonë, ka çuar në arrestimin e autorit të dyshuar, 32-vjeçarit Indrit Halili.

Të plagosurit janë identifikuar si Kristi Kostandini, 32 vjeç, dhe një tjetër person 39 vjeç, të cilët fatmirësisht ndodhen jashtë rrezikut për jetën. Pamjet filmike, tashmë në duart e hetuesve, kanë zbardhur momentet e tensionit të lartë dhe përplasjes fizike që përshkallëzoi në përdorimin e thikës.

Kristi Kostandini ka dhënë një dëshmi të drejtpërdrejtë për ngjarjen, duke përshkruar momentin kur u përball me autorin:

“Nuk e njihja fare. Ai erdhi te biznesi i shokut, sulmoi shitësen dhe më pas edhe mua. Më goditi katër herë me thikë, dy herë në krah, një në stomak dhe një pranë ijës. Unë thjesht u mbrojta, i ktheva me grushta për të shpëtuar veten”, ka treguar Kostandini.

Policia e Vlorës ka njoftuar se po vijon punën për të zbardhur rrethanat e plota të ngjarjes dhe për të përcaktuar motivet që çuan në këtë përplasje të dhunshme.