Papa Françesku ka komentuar dy kandidatët presidencialë amerikanë, duke këshilluar votuesit katolikë të zgjedhin “të keqen më të vogël” në zgjedhjet e nëntorit. Në një koment të rrallë politik gjatë një konference për shtyp, Papa theksoi se mos mirëpritja e emigrantëve, referuar indirekt ish-presidentit Donald Trump, është një mëkat “i rëndë”, ndërsa qëndrimi i Kamala Harris mbi abortin është krahasuar me një “vrasje”.

“Të dy janë kundër jetës, qoftë ai që dëbon emigrantët, qoftë ai që vret foshnjat,” tha Papa në konferencën e mbajtur të premten, ndërsa përfundonte një turne 12-ditor në Azinë Juglindore. Edhe pse Papa nuk përmendi emrat e kandidatëve, komentet e tij ishin të drejtpërdrejta.

Papa Françesku, i cili nuk është amerikan dhe nuk ka të drejtë vote në zgjedhjet amerikane, u kërkua të ofronte këshilla për votuesit katolikë. Ai theksoi rëndësinë e votimit, duke e cilësuar mosvotimin si një veprim të shëmtuar dhe të papranueshëm.

“Ju duhet të zgjidhni të keqen më të vogël. Kush është e keqja më e vogël? Ajo zonja apo ai zotëri? Nuk e di. Të gjithë, në ndërgjegje, (duhet) të mendojnë dhe ta bëjnë këtë,” u shpreh Papa Françesku.