Një ngjarje e paprecedentë është regjistruar në Librazhd, ku një 36-vjeçar, i afërm i çiftit të moshuar dhe dhëndri i tyre, është arrestuar pasi dyshohet se u ka dhënë valium prindërve të bashkëshortes dhe më pas u ka vjedhur një shumë parash dhe një celular.

Policia njoftoi se pas hetimeve intensive, falë operacionit të koduar “Opportunity”, u bë e mundur kapja e shtetasit Ismail Kllogjri. Materialet e sekuestruara përfshijnë shumën e parave të vjedhura dhe një celular, të cilat u morën si prova materiale.

Ngjarja u zbulua pasi dy bashkëshortët u dërguan fillimisht në spitalin e Librazhdit dhe më pas në QSUT në gjendje të rënduar shëndetësore, të dyshuar për intoksikim me medikament qetësues. Policia dhe Seksioni për Hetimin e Krimeve kundër Personit në DVP Elbasan, në bashkëpunim me Prokurorinë e Elbasanit, organizuan një operacion të shpejtë dhe të koordinuar për zbardhjen e plotë të ngjarjes.

Hetimet treguan se autori u ka administruar çiftit të moshuar një dozë të lartë të valiumit, duke shkaktuar dëmtime të rënda shëndetësore, dhe më pas ka kryer vjedhjen në banesën e tyre. Të dy bashkëshortët ndodhen jashtë rrezikut për jetën dhe po marrin kujdesin e mjekëve.

Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Elbasan për veprime të mëtejshme.