Këngëtarja e njohur shqiptare, Parashqevi Simaku, ka thyer heshtjen pas akuzave dhe komenteve që, sipas saj, i janë bërë gjatë 10 muajve të fundit. Në një postim në rrjetet sociale, Simaku u shpreh se emri i saj është përdorur si “tabelë qitjeje” nga persona që kërkojnë vëmendje përmes shpifjeve dhe të pavërtetave.

Reagimi i saj erdhi vetëm pak ditë pas deklaratës së influenceres Shqipe Hysenaj, e cila ka përmendur këngëtaren si pjesë e thashethemeve në komunitetin shqiptar në SHBA, duke e akuzuar se “u merrte burrat të tjerave”.

Parashqevi Simaku i ka cilësuar këto akuza si të pabaza dhe të përsëritura ndër vite. Ajo kujtoi se edhe gjatë viteve 1985–1988, në kulmin e suksesit të saj me çmime të fituara në festivale, ishte përballur me “mllef dhe zili”.

“Mua nuk më bëni dot asgjë. Publiku im më njeh prej vitesh dhe e di shumë mirë kush jam, çfarë kam dhënë dhe çfarë përfaqësoj”, shkruan artistja.

Në postimin e saj, këngëtarja theksoi se nuk ka ndërmend të ndalet përballë shpifjeve dhe se do të vazhdojë rrugën e saj “me dinjitet dhe të vërtetën në krah”.