Një zhvillim i pazakontë ka ndodhur sot në Vlorë: Erinolda Lushaj është rikthyer në krye të Ndërmarrjes së Gjelbërimit, duke u prezantuar para punonjësve si drejtore e re e institucionit. Ajo ka mbajtur më herët postin e drejtoreshës së NSHP-së, por rikthimi i saj ka ngritur pikëpyetje të forta, pasi është bërë pa një shkresë zyrtare apo vendim emërimi.
Situata ka ngjallur reagime, sidomos për faktin se pak muaj më parë, kryeministri Edi Rama kishte deklaruar se drejtuesit e institucioneve lokale nuk do të “ricikloheshin” në pozita të tjera pas largimeve të tyre.
Ndërkohë, një tjetër rikthim është regjistruar në bashkinë e Vlorës: Zambak Selmani është emëruar sërish drejtor i Urbanistikës, këtë herë nga kryetari i komanduar i bashkisë, Elis Halili.
Këto lëvizje kanë hapur debat mbi transparencën dhe kriteret e emërimeve në administratën vendore, duke vënë në qendër të vëmendjes pyetjen: a po kthehet Vlora në një skenë të riciklimit politik dhe administrativ, përtej deklaratave të kryeministrit?
