Parlamenti i Shqipërisë ka miratuar me 108 vota pro ndryshimet në Kodin Zgjedhor, që synojnë lehtësimin e procedurave të votimit për emigrantët. Këto ndryshime pritet të mundësojnë që ata që jetojnë jashtë vendit të kenë mundësi më të mira për të marrë pjesë në zgjedhje, duke e bërë procesin më të thjeshtë dhe më të aksesueshëm për ta.

Ndërkohë, pavarësisht retorikës akuzuese në seancën e sotme, që u përqendrua në çështje të tjera të ndjeshme, rendi i ditës u përmbush me miratimin e këtyre ndryshimeve.

Kryetari i grupit parlamentar të Partisë Socialiste, Taulant Balla, ka theksuar se diaspora mund të kontribuojë në mënyrë të konsiderueshme për të ndryshuar fatin politik të vendit. Ai ka shprehur bindjen se emigrantët do të sigurojnë 84 mandate për PS, pa pasur nevojë të diskutohet më tej me opozitën.

“Diaaspora na jep 84 mandate për të reformuar vendin, pa pasur nevojë të diskutojmë me ju,” ka deklaruar Balla, duke theksuar rolin e rëndësishëm që ata do të luajnë në zgjedhjet e ardhshme.