Sekretari i Përgjithshëm i Partisë së Lirisë, Tedi Blushi, mori pjesë në homazhet për ish-kryeministrin dhe ish-liderin e Partisë Socialiste, Fatos Nano, duke e vlerësuar atë si një figurë kyçe të tranzicionit politik shqiptar.

Në një prononcim për mediat, Blushi theksoi se kontributi i Nanos ishte vendimtar në transformimin e Partisë së Punës në një forcë moderne socialdemokrate me orientim evropian.

“Në emër të Presidentit të PL, Ilir Meta, në emër të Partisë së Lirisë dhe në emrin tonë personal, i shprehim sot ngushëllimet më të sinqerta për familjen, bashkëpunëtorët dhe simpatizantët e zotit Nano,” – u shpreh Blushi.
“Ai ishte një figurë kyçe e tranzicionit politik shqiptar, që pati meritën e transformimit të Partisë së Punës në një parti socialdemokrate evropiane. Dy qëndrimet e tij – se duhet të lëshojmë pushtet për të ndërtuar shtet dhe se zgjedhjet e lira janë më të rëndësishme sesa rezultati – duhet të mbeten udhërrëfyes për të majtën shqiptare,” shtoi ai.

Homazhet për Fatos Nanon po mbahen në Pallatin e Kongreseve, ku marrin pjesë përfaqësues të shumtë të politikës shqiptare, përfshirë drejtues të mazhorancës dhe opozitës.