Partia Socialiste do të mbledhë nesër në qytetin e Durrësit Asamblenë Kombëtare. Sekretari i Përgjithshëm i PS-së, Blendi Klosi, ka zbardhur axhendën e kësaj mbledhjeje të rëndësishme.

Mbledhja e Asamblesë do të nisë në orën 11:00 dhe do të hapet me një fjalim nga kryesocialisti Edi Rama. Pas fjalës së tij, do të zhvillohet votimi për organet e reja drejtuese të PS-së, përfshirë Kryesinë dhe Sekretariatin e PS-së.

Asambleja e re e PS-së është zgjedhur nga votat e delegatëve të Kongresit të PS-së që u mbajt më 28 korrik të këtij viti. Kjo asamble ka rreth 350 anëtarë, nga të cilët Kongresi i korrikut zgjodhi vetëm 156 prej tyre, ndërsa pjesa tjetër u zgjodh automatikisht për shkak të funksioneve drejtuese që ata mbajnë. Në këtë vit zgjedhor, partia që ka mazhorancën në parlament ka filluar të ndezë motorët e saj për të përgatitur fushatën zgjedhore.

Një javë më parë, në prag të nisjes së sesionit të ri parlamentar, kryeministri Rama mblodhi kabinetin e ministrave në rezidencën qeveritare në Dajt, një mbledhje që nuk pati shumë detaje publike. Asambleja e nesërme do të ketë një rol kyç në përzgjedhjen e listës së kandidatëve të PS-së për deputetë në zgjedhjet parlamentare të vitit 2025.