Pas liberalizimit të vizave nga shtetet anëtare të zonës Schengen, pasaporta e Kosovës ka ngjitur 90 pozicione në Indeksin e Pasaportave të VisaGuide.World. Bazuar në përditësimin e janarit, pasaporta e Kosovës tani renditet në vendin e 98-të, duke u ngjitur nga pozita e 188-të muajin e kaluar.
Themeluesi i VisaGuide.World, Besart Bajrami, e quan këtë lëvizje si një “arritje historike” për Kosovën.

Që nga data 1 janar 2024, poseduesit e pasaportave biometrike të Kosovës mund të udhëtojnë pa viza në 44 vende të botës. Përveç kësaj, qytetarët e Kosovës mund të hyjnë edhe në katër vende të tjera pa pasaportë, vetëm me letërnjoftim – Shqipëri, Maqedoninë e Veriut, Mal të Zi dhe Serbi.

Gjithsesi, qytetarët e Kosovës kanë nevojë për vizë tradicionale për të udhëtuar në gjithsej 97 vende të botës, vizë që merret në kufi kur planifikojnë të vizitojnë 32 shtete, si dhe një e-vizë për 33 vende.