Besimtarët katolikë dhe ortodoksë kremtuan këtë të premte, si rrallë herë, në të njëjtën ditë meshët e Pashkës, duke përjetuar momente të thella shpirtërore, lutje dhe devotshmëri në prag të Ringjalljes së Krishtit.

Në Kishat Ortodokse, u mbajt shërbesa e Shkëputjes së Krishtit nga Kryqi, ndërsa pasdite u zhvillua procesioni solemn i Epitafit – arkivolit simbolik të Krishtit. Kori kishtar dhe klerikët shoqëruan Epitafin në rrugët e qytetit, mes një atmosfere të qetë dhe të përmalluar. Qytetarë të shumtë u gjunjëzuan për të prekur arkivolin simbolik, në një gjest të përkushtimit të thellë shpirtëror.

Ndërkohë, në sheshin “Nënë Tereza” në Tiranë, besimtarët katolikë u mblodhën për të ndjekur ritin e Udhës së Kryqit, të udhëhequr nga Arqipeshkvi Metropolit, Imzot Arjan Dodaj. Në fjalën e tij, Imzot Dodaj u ndal veçanërisht tek të rinjtë, duke i ftuar ata që të mos humbasin shpresën dhe të mbajnë gjallë dritën e besimit dhe dashurisë.

Lutjet dhe qirinjtë e ndezur ishin mesazhe për shëndet, mëshirë dhe paqe për botën. Nga klerikët dhe të pranishmit nuk munguan urimet për Pashkë të bekuara, ndërsa përfundimi i të Premtes së Zezë shënon hyrjen në kremtimin e Ringjalljes – simbol i jetës së re dhe shpresës hyjnore.