Komisioni Qendror i Zgjedhjeve miratoi tri koalicione për zgjedhjet parlamentare të datës 11 maj 2025, ndër të cilat përfshihet edhe koalicioni “Partia Demokratike, Aleanca për Shqipërinë Madhështore”, i kryesuar nga PD e Sali Berishës, që do të përfaqësohet nga 25 parti, përfshirë edhe aleatët kryesorë si Partia e Lirisë (PL) e Ilir Metës, PDIU e Shpëtim Idrizit, PR e Fatmir Mediut dhe PAA e Agron Dukës.

PD ka shpallur një listë të përbashkët të kandidatëve të mundshëm për deputet, ku përfshihen 40 emra. Nga ky grup, 15 emra janë tashmë të njohur për qytetarët e Tiranës, ndër të cilët: Sali Berisha, Jozefina Topalli, Belind Këlliçi, Ilir Meta, Albana Vokshi, Edi Paloka, Flamur Noka, Jorida Tabaku, Ilir Alimehmeti, Ilda Zhulali, Shpëtim Idrizi, Fatmir Mediu, Klevis Balliu, Myslim Murrizi, ndër të tjerë.

Po ashtu, janë shpallur 11 drejtuesit e qarqeve, të cilët janë të përfshirë në listë, duke përfshirë: Oerd Bylykbashi, Agron Gjekmarkaj, Luçiano Boçi, Gazment Bardhi, Flamur Hoxha, Xhelal Mziu, Tomor Alizoti, Ivi Kaso, Eno Bozdo, Bujar Leskaj dhe Tritan Shehu.

Një tjetër grup përbëhet nga fituesit e primareve, ku janë: Shkëlzen Ibra, Ina Zhupa, Ramadan Likaj, Alma Buci, Ilir Krosi, Igli Cara, Eduart Sharka, Zija Ismaili, Bledion Nallbati, Gjin Gjoni, Dashnor Sula, Hysen Kadiu, Klevis Balliu dhe Grigels Muçollari.

Në total, janë 40 emra, të cilët priten të jenë kandidatët kryesorë të PD-së për zgjedhjet e ardhshme, ndërsa mund të ketë mundësi për ndryshime në listën e hapur, që mund të sjellë surpriza në procesin zgjedhor.