Komisioni i Ankimimeve dhe Sanksioneve (KAS), ka rrëzuar kërkesën e Partisë Drejtësi Integrim dhe Unitet, për anëtarin e grupit të numërimit të votave, në zgjedhjet e 25 prillit. KAS la në fuqi vendimin e kryekomisionerit Ilirjan Celibashit, i cili vendosi që PDIU të mos ketë numërues votash, me argumentin se është në koalicion me PD.

“Bazuar në analizën e fakteve dhe provave, me shumicë votash, vendosi rrëzimin e kërkesës ankimore të paraqitur nga PDIU, ky vendim hy në fuqi menjëherë. Për këtë vendim në rast kontenstimesh mund të bëhet ankesë në Kolegjin Zgjedhor, brenda pesë ditëve”, tha KAS.

Fletët e votimit në zgjedhjet e 25 prillit, do të numërohen nga grupet e numërimit me 2 anëtarë të PS, 1 të PD dhe 1 të LSI. Komisioni Qendror i Zgjedhjeve vendosi pak ditë më parë që anëtari i katërt i grupit të numërimit të jetë përfaqësues nga Lëvizja Socialiste për Integrim, duke i hequr mundësinë PDIU të kishte anëtarin e saj, ndonëse kjo forcë politike kishte më shumë se 2 mandate në zgjedhjet e kaluara.

Kundër këtij vendimi mund të behet ankim në Kolegjin Zgjedhor, brenda 5 ditëve nga hyrja në fuqi e tij.

Përfaqësuesi i PDIU-së kërkoi rrëzimin e vendimit të KQZ-së duke theksuar se vendimi është në kundërshtim me ligjin.

“Ne jemi parti parlamentare, kjo ka qenë pika kur komisionari ka është bazuar për të ndryshuar pikën e këtij vendimi. Kërkojmë ndryshimin e vendimit, si vendim në kundërshtim me ligjin dhe PDIU të marrë pjesë në shortin e anëtareve të numërimit” , tha ai.