Një përleshje masive ndodhi mbrëmë (8 Shtator) në rrugët e Stradella, në provincën Pavia të Italisë, ku u raportua për 7 persona të plagosur rëndë dhe lehtë. Ngjarja përfshiu të paktën 20 individë dhe ndodhi në një zonë të quajtur “Via Pozzone”.

Dy grupe rivale, njëri prej të cilëve përbëhej nga egjiptianë të Stradellës dhe tjetri nga shqiptarë që kishin ardhur nga Montù Beccaria dhe qytete të tjera të afërta, u përplasën për motive ende të panjohura. Përleshja, e cila zgjati disa minuta dhe përfshinte arratisje dhe ndjekje, përfundoi me lëndime të shumta.

Një nga të plagosurit, një 25-vjeçar shqiptar nga Montù Beccaria, u godit me thikë dhe u transportua në spitalin San Matteo, por nuk është në rrezik për jetën. Gjashtë të plagosurit e tjerë, që pësuan mavijosje në fytyrë, gjoks dhe bark, u dërguan në spitalet e Stradella, Voghera, Cremona dhe Piacenza.

Patrullat e karabinierëve dhe ekipet e shëndetësisë që mbërritën në vendngjarje filluan hetimet për të identifikuar të dëmtuarit dhe të tjerët e përfshirë në incident. Megjithatë, deri tani nuk janë publikuar identitetet e të përfshirëve dhe motive të sakta të përleshjes. Dyshimet për larje hesapesh apo prishje pazaresh janë të pranishme, por nuk ka prova të qarta që të mbështesin këto hipoteza.