Shirat e rrëmbyeshëm dhe përmbytjet më të rënda të dekadave të fundit kanë goditur Vietnamin qendror, duke shkaktuar të paktën 35 viktima gjatë kësaj jave, sipas autoriteteve të menaxhimit të fatkeqësive. Pesë persona të tjerë raportohen ende të zhdukur.

Rreshjet intensive, që kanë përfshirë provincat bregdetare që nga fundjava e kaluar, kanë sjellë nivele rekord reshjesh, me deri në 1.7 metra ujë brenda vetëm 24 orëve, nga e diela në të hënë.

Situata është veçanërisht e rëndë në Hoi An, qyteti historik që është pjesë e Trashëgimisë Botërore të UNESCO-s, ku rrugët janë përmbytur plotësisht dhe banorët lëvizin me varka përmes ujërave që kanë përfshirë shtëpi e biznese.

Autoritetet raportojnë se niveli i lumit ka arritur pikën më të lartë në 60 vitet e fundit, duke lënë mijëra familje të izoluara, rrugë të bllokuara dhe toka bujqësore të shkatërruara. Deri më tani, më shumë se 16,500 shtëpi janë përmbytur, ndërsa rreth 40,000 kafshë janë mbytur nga vërshimet.

Ekipet e emergjencës po punojnë për të shpëtuar banorët e bllokuar, ndërsa autoritetet paralajmërojnë se rreshjet pritet të vazhdojnë edhe në ditët në vijim, duke rritur rrezikun për rrëshqitje dherash dhe dëme të tjera në infrastrukturë.