Zëdhënësi i Kremlinit, Dmitry Peskov, ka deklaruar se një takim mes Presidentit rus Vladimir Putin dhe Presidentit amerikan Donald Trump mund të zhvillohet në të ardhmen, por aktualisht nuk konsiderohet i domosdoshëm.

“Në teori, një takim është i mundur, por nuk ka nevojë për të në këtë moment,” tha Peskov për agjencinë ruse TASS.

Sipas tij, prioriteti në këtë fazë duhet të mbetet puna e kujdesshme dhe e detajuar për çështjet që lidhen me një marrëveshje të mundshme për Ukrainën.

“Ajo që nevojitet në vend të një samiti është një punë shumë e kujdesshme mbi çështjet e marrëveshjes ukrainase,” theksoi zëdhënësi i Kremlinit.

Deklarata e Peskovit vjen në një moment kur në arenën ndërkombëtare po shtohen zërat për nevojën e rifillimit të dialogut mes Moskës dhe Uashingtonit, në përpjekje për të gjetur një zgjidhje diplomatike për konfliktin në Ukrainë.