Bardonecchia, Torino – Qyteti turistik i Bardonecchias u përfshi nga përmbytje të mëdha pas daljes nga shtrati të lumit Frejus, si pasojë e reshjeve të dendura që goditën zonën.

Uji i lumit pushtoi rrugët e qytetit, duke bllokuar trafikun dhe duke detyruar autoritetet të shpallin alarm maksimal. Ngjarja vjen vetëm dy vite pas përmbytjes së madhe të gushtit 2023, që kishte shkaktuar dëme të konsiderueshme.

Kryetarja e Bashkisë, Chiara Rossetti, u bëri apel qytetarëve që të mos afrohen pranë urave dhe të shmangin çdo lëvizje të panevojshme:
“Mos dilni nga shtëpia, mos përdorni makinën dhe ndiqni me përpikëri udhëzimet e autoriteteve lokale,” theksoi ajo.

Pamjet e shpërndara në rrjetet sociale tregojnë rrugë të zhytura nën ujë dhe dëme materiale në infrastrukturë. Përmbytje të rënda u regjistruan edhe në autostradën A32 Torino-Bardonecchia, ku u mbyll dalja për në zonën turistike në të dy drejtimet.

Gjithashtu, edhe lumi Dora ka dalë nga shtrati në pjesën e poshtme të qytetit, duke përmbytur rrugët përreth dhe krijuar situatë emergjente për banorët.

Autoritetet vijojnë monitorimin e situatës dhe punojnë për përmirësimin e kushteve dhe shmangien e rreziqeve për banorët dhe turistët.