Momente tensioni janë regjistruar mbrëmjen e sotme në sheshin “Nënë Tereza” në Tiranë, vetëm pak metra larg stadiumit “Air Albania”, pas përfundimit të ndeshjes mes Dinamos dhe Jagiellonias së Polonisë.

Një grup tifozësh shqiptarë janë afruar pranë autobusit të ekipit polak dhe kanë nisur thirrjet dhe sharjet ndaj tyre. Situata u përshkallëzua për pak çaste, ndërsa efektivët e policisë ndërhynë menjëherë për të shmangur përplasjen e drejtpërdrejtë.

Ky reagim i tifozëve shqiptarë lidhet me incidentin e rëndë të ndodhur më herët gjatë ditës, kur disa tifozë të Jagiellonias u filmuan duke përdhosur monumentin e Skënderbeut dhe duke bërë thirrje pro-serbe, përfshirë kore të tipit “Vritini shqiptarët” dhe shpalosjen e një flamuri me mbishkrimin “Kosova është Serbi” në qendër të Tiranës.

Policia e Shtetit ka rritur masat e sigurisë në zonë për të shmangur përshkallëzimin e mëtejshëm të situatës. Deri më tani nuk raportohet për persona të lënduar apo të shoqëruar, por pritet një reagim zyrtar mbi incidentet e sotme.