KOSOVË – Pesë zyrtarë të Policisë së Kosovës janë arrestuar të hënën mbrëma pas një ndërhyrjeje të dyshimtë që përfundoi me vdekjen e një burri të ri në qytetin e Lipjanit. Inspektorati Policor i Kosovës (IPK) njoftoi se ndaj tyre rëndon dyshimi për veprën penale “vrasje nga pakujdesia”.

Ngjarja ka ndodhur në orët e para të mëngjesit, ndërsa IPK-ja bëri të ditur se ka rekomanduar suspendimin e përkohshëm të pesë zyrtarëve të përfshirë – një rreshter dhe katër policë – dhe më pas ka urdhëruar ndalimin e tyre për 48 orë, me autorizim të Prokurorisë Themelore në Prishtinë.

Sipas policisë, viktima – një 27-vjeçar – dyshohej se ndodhej nën ndikimin e alkoolit dhe po sulmonte automjete e kalimtarë. Në vendngjarje ishte thirrur edhe ndihma mjekësore, por pavarësisht përpjekjeve, i riu u shpall i vdekur në vend.

IPK ka nisur mbledhjen e provave materiale dhe analizimin e pamjeve të kamerave të sigurisë, si dhe ka njoftuar se hetimi do të përfshijë edhe ekspertizën mjeko-ligjore për të përcaktuar shkakun dhe kohën e saktë të vdekjes.

Ndërkohë, pjesëtarë të shoqërisë civile kanë reaguar me shqetësim. Ehat Miftaraj nga Instituti i Kosovës për Drejtësi, përmes një reagimi në rrjetet sociale, e cilësoi veprimin e policëve si “amatorizëm të skajshëm” dhe kërkoi hetim të menjëhershëm për aftësitë profesionale të efektivëve të përfshirë.

Diskutime janë rindezur edhe mbi trajnimin e oficerëve të rinj të Policisë së Kosovës. Prej më shumë se një viti, trajnimi bazë për policët e rinj është reduktuar nga gjashtë muaj në vetëm 12 javë. Kjo reformë, sipas zyrtarëve policorë, është bërë në përputhje me “nevojat operative”, por është cilësuar si alarmante nga ekspertët e sigurisë.

Akademia e Kosovës për Siguri Publike, ku trajnohen efektivët, është akredituar nga një agjenci amerikane e specializuar në standardet për zbatim të ligjit. Megjithatë, mungesa e një trajnimi më të gjatë dhe mungesa e sigurimeve shëndetësore e jetësore për policët vazhdojnë të mbeten çështje të mprehta për debat.

Rasti i Lipjanit ka ndezur një tjetër valë kërkesash për përgjegjësi, transparencë dhe rishikim të politikave në sistemin e sigurisë së vendit. Hetimet janë në vijim.