Petrit Qoli, i akuzuar për vrasje me paramendim dhe i përfshirë në dosjen e njohur “Plumbi i Artë”, ka hedhur akuza të rënda ndaj bashkëpunëtorit të tij Nuredin Dumani, i cili nuk ka mundur të paraqitet në seancën gjyqësore për shkak të arsyeve shëndetësore.

Nga qelia e tij, Petrit Qoli ka shprehur një lloj kënaqësie për punën e SPAK dhe GJKKO, por ka theksuar se ndihet i detyruar të bëhet vrasës, siç ka thënë ai, si Nuredin Dumani. Ai ka bërë deklarata të forta, duke thënë:

“Si çdo shqiptar dhe ata të Diasporës, jam i lumtur për SPAK dhe GJKKO. Dumani, si vrasës me pagesë, shijon jetën jashtë sallës, ndërsa ne po baltosemi.”
Duke theksuar shpenzimet e Dumanit për luksin, ai ka shtuar: “Ai do Coca Cola, palestër dhe femra. Unë kam humbur 40 kg dhe jemi në burg kot.”

Petriti Qoli ka kërkuar që prokuroria dhe gjykata të ndihmojnë për të hequr ‘balten’ që ai ndien mbi veten e tij dhe ka shprehur frikën se mund të vdesë nga sëmundje, jo nga burgu. Ai e ka krahasuar situatën e tij me atë të Dumanit, duke theksuar se është i detyruar të ndjekë një rrugë të ngjashme.

Në përfundim, ai ka bërë një deklaratë të fortë, duke thënë: “Do bëhemi si Nuredini, do vrasim 5-6 veta dhe do të marrim 5 milionë euro të grumbulluara. Kështu do dalim dhe do marrim statusin.”

Në përfundim të seancës, gjykata është tërhequr në dhomë këshillimi për të vendosur nëse do të vazhdojë seanca me mungesën e bashkëpunëtorit të drejtësisë, Nuredin Dumani.