Në Gjykatën e Korçës është zhvilluar sot seanca për caktimin e masës së sigurisë për 4 personat e arrestuar lidhur me plagosjen e 27-vjeçarit Ari Kodra.

Gjykata ka vendosur masën “detyrim paraqitje” për tre prej të arrestuarve: Isuf Dalip, Dhimitër Kodra dhe Bilal Shkëmbi. Ndërsa për Thanas Paskalin është vendosur që të hetohet në gjendje të lirë.

Autorit të plagosjes, Aleks Qiqi, masa e sigurisë pritet t’i komunikohet në spital, ku ndodhet pas plagosjes. Pas ngjarjes, katër të arrestuarit kanë reaguar duke goditur edhe Qiqin, i cili mbeti me dëmtime.

Ngjarja ndodhi pasditen e 15 gushtit në fshatin Mollaj të Korçës, kur Ari Kodra u sulmua me thikë nga Aleks Qiqi. Autori, i cili ishte pak kohë jashtë burgut, është i dënuar më parë për disa vepra penale, përfshirë çështje droge, dhe ka precedentë edhe në Greqi.

Ngjarja është ende nën hetim nga autoritetet, ndërsa qytetarët e zonës mbeten të shqetësuar për rritjen e incidenteve të dhunës.