Policia e Beratit ka finalizuar një operacion të gjerë, duke arrestuar katër persona të dyshuar për shpërndarjen e drogës në një klub nate. Arrestimet janë bërë pas kërkesës së Prokurorisë pranë Gjykatës së Shkallës së Parë të Juridiksionit të Përgjithshëm Berat, për akuzën e “Prodhimit dhe shitjes së narkotikëve.”

Në mesin e të arrestuarve është pronari i klubit, E.V., dhe bodyguardi K.D. Hetimet u drejtuan nga Prokuroria dhe morën pjesë Drejtoria e Forcës së Posaçme Operacionale dhe Sektori i Agjentëve në Mbulim. Gjatë operacionit, policia ka sekuestruar 28 doza të dyshuara kokainë, të mbështjella me qese të tejdukshme. Po ashtu, në banesën e pronarit të klubit u gjetën pesë doza të tjera kokainë dhe një peshore elektronike.

Një tjetër zbulim i rëndësishëm është bërë në automjetin e bodyguardit K.D., ku në xhepin e derës janë gjetur 23 doza kokainë të fshehura në një vezë të ngjashme me ato të kinderave, të ngjyrës së verdhë.

Ky operacion ka goditur një rrjet të mundshëm shpërndarës të drogës në një nga lokalet më të njohura të Beratit.