Policia e Korçës, me një vendim gjykate, ka kryer një kontroll në banesën e shtetasit M. D., 33 vjeç, në qytetin juglindor. Gjatë kontrollit, autoritetet gjetën dhjetra doza lënde narkotike kokainë, të cilat u sekuestruan si prova materiale.

Megjithatë, në momentin e kontrollit, 33-vjeçari nuk ishte i pranishëm në banesë dhe aktualisht është shpallur në kërkim për veprat penale “Prodhimi dhe shitja e narkotikëve”, “Organizimi i lotarive të palejuara” dhe “Mosbindja ndaj urdhrit të punonjësit të policisë së rendit publik”.

Sipas njoftimit të policisë, më datë 27 Shtator, M. D. nuk i është bindur urdhrit të punonjësve të Policisë për të ndaluar automjetin, duke u larguar me shpejtësi. Nga hetimet rezulton se ai dyshohet se ushtronte veprimtari kriminale të shitjes së lëndëve narkotike dhe organizimit të lojërave të fatit.

Puna për kapjen e tij vazhdon, dhe materialet procedurale i kaluan Prokurorisë së Korçës për veprime të mëtejshme.