Policia e Shtetit ka finalizuar një tjetër fazë të operacionit për goditjen e skemave piramidale online, duke arrestuar Ereledio Shebekun, 35 vjeç, i shpallur më herët në kërkim së bashku me bashkëshorten e tij, Alma Shebeku.

Sipas njoftimit zyrtar, çifti dyshohet si organizatori kryesor i mashtrimit financiar që operonte përmes platformës së rreme “XUEX”, në zonën e Divjakës. Skema kishte rekrutuar qindra qytetarë me premtimin se investimet e tyre në kriptomonedha si USDT dhe TRON do të shumëfishoheshin.

Më herët, në kuadër të të njëjtit operacion, policia kishte arrestuar edhe Brunilda Todin (motra e Ereledio Shebekut), si dhe shtetasit Arbër Çela, Emanuel Taullau, Flavio Mukaj, Marius Kodra dhe Brunilda Ndini. Këta individë shërbenin si “agjentë terreni”, duke promovuar platformën mashtruese dhe duke rekrutuar qytetarë të rinj nëpërmjet rrjeteve sociale dhe aplikacionit “Telegram”.

Hetimet zbuluan se Shebeku, përmes aplikacionit, shpërndante linkun e “XUEX” dhe trajnonte të afërmit e tij, përfshirë gruan dhe dy punonjëse të Bashkisë Divjakë, për t’u angazhuar në mashtrim. Në “Telegram”, të rekrutuarit merrnin udhëzime nga një person i prezantuar si “Leo Smith”, i cili i ftonte pjesëmarrësit të futeshin online në orare të caktuara për të bërë “like” faqe të ndryshme, me premtimin se do të përfitonin 1% të investimit të tyre. Në realitet, asnjë prej qytetarëve nuk ka arritur të tërheqë paratë, pasi pagesat ishin të bllokuara.

Sipas policisë, përdorimi i kriptomonedhave në këtë skemë nuk ishte rastësor, por i menduar për shkak të vështirësisë së gjurmimit dhe perceptimit të gabuar të tyre si mjete të sigurta investimi.

Në Shqipëri, mashtrimet e ngjashme po kryhen edhe përmes platformës tjetër “TXEX”, duke përfshirë mijëra qytetarë. Rekrutimi bëhet kryesisht përmes të njohurve, të cilët pasi investojnë dhe dërgojnë faturat, pranohen në grupet e mbyllura të “Telegram”-it.

Operacioni i Policisë vijon, ndërsa Alma Shebeku mbetet ende në kërkim.