Duke nisur nga mbrëmja e të premtes, Policia e Shtetit ka vënë në zbatim planin e masave për monitorimin e protestës së thirrur nga Sali Berisha dhe ruajtjen e rendit dhe qetësisë këtë të shtunë.

Në fokus të masave të policisë, është ruajtja e institucioneve shtetërore.

Njësitë FNSH do të qëndrojnë në gatishmëri dhe turma do të monitorohet nëpërmjet kamerave të sigurisë për të evidentuar elementë të dhunshëm apo që synojnë të destabilizojnë rendin publik.

Forca të shumta policie janë pozicionuar këtë të shtunë edhe rreth godinës së Kryeministrisë dhe Kuvendit të Shqipërisë.

Dhjetra furgonë policie, autoblinda të forcave speciale të RENEA-s dhe autobote me ujë janë vendosur në zonën në krah të Parlamentit.

Forcat speciale të RENEA-s janë pozicionuar si në ambient e jashtme të Parlamentit, në pjesën e pasme të selisë së PD-së por edhe në brendësi të Kuvendit të Shqipërisë.